ಸಂಪಾದಕರ ನುಡಿ ✍️ ಕುರಿತು ವಿಮರ್ಶೆ

ಮಾಸ: ಏಪ್ರಿಲ್ 2025, 

ಪತ್ರಿಕೆ : ಕಲ್ಯಾಣ ಕಿರಣ

ಸಂಪಾದಕರು : ಪೂಜ್ಯ ಮಾತೆ ಗಂಗಾದೇವಿಯವರು

ಎಪ್ರಿಲ್ ಮಾಸದ, ಕಲ್ಯಾಣ ಕಿರಣದ 'ಸಂಪಾದಕರ ನುಡಿ ' ವಿಭಾಗದಲ್ಲಿ ಪೂಜ್ಯ ಮಾತೆ ಗಂಗಾದೇವಿಯವರು ತಮ್ಮ ಗುರುಗಳಾದ ಪರಮಪೂಜ್ಯ ಮಾತೆ ಮಹಾದೇವಿಯವರ ಕುರಿತು "ಬಾವನ್ನ ವೃಕ್ಷವು ಎಲ್ಲಿದ್ದರೇನು, ಪರಿಮಳ ಒಂದೇ" ಎಂಬ ಶೀರ್ಷಿಕೆಯಲ್ಲಿ ಬರೆದಿರುವ ಲೇಖನದಲ್ಲಿ ಕೆಲವು ಸಾಲುಗಳು ಈ ರೀತಿ ಇವೆ. 

*"ಗುರು ಬಸವ ತಂದೆಯವರ ಆಶೋತ್ತರವನ್ನು ಪೂರೈಸಲೆಂದೆ ಜನ್ಮ ತಳೆದು ಬಸವಾತ್ಮಜೆ ಎಂಬ ನಾಮಾಂಕಿತದಿಂದ ಶೋಭಿತರಾದ ಪರಮಪೂಜ್ಯ ಮಾತಾಜಿಯವರ ಜೀವನ, ಸಾಧನೆ, ಸಂದೇಶಗಳಿಗೆ ಈ ವಚನ ಧ್ವನಿಯಾಗಿರುವುದು ಒಂದು ಸುಕೃತ ವಿಶೇಷ ಅಂದರೆ ತಪ್ಪಲ್ಲ"*

ಪೂಜ್ಯ ಮಾತೆ ಗಂಗಾದೇವಿಯವರೇ ತಾವು ಬರೆದಿರುವ ಈ ಸಾಲುಗಳ ಪ್ರಕಾರ, ಪರಮಪೂಜ್ಯ ಮಾತೆ ಮಹಾದೇವಿಯವರು ಗುರು ಬಸವಣ್ಣನವರ ಆಶೋತ್ತರವನ್ನು ಪೂರೈಸಲೆಂದೇ ಜನ್ಮ ತಳೆದು ಹುಟ್ಟಿ ಬಂದಿದ್ದಾರೆ ಎಂದು ಹೇಳಿದ್ದೀರಿ. ತಮ್ಮ ಪ್ರಕಾರ ಪೂಜ್ಯ ಮಾತೆ ಮಹಾದೇವಿಯವರು ಪ್ರತಿಯೊಂದು ಕಾರ್ಯವು ಕೂಡ *ಗುರುಬಸವಣ್ಣನವರ ಆಶಯದ* ಪ್ರಕಾರ ಮಾಡಿ ಹೋಗಿದ್ದಾರೆ. 

ಅಂದಮೇಲೆ ಅವರು ಪ್ರತಿಷ್ಠಾಪನೆ ಮಾಡಿ ಹೋಗಿರುವ "ಲಿಂಗದೇವ ವಚನಾಂಕಿತ" ಕಾರ್ಯವು ಕೂಡ ಗುರುಬಸವಣ್ಣನವರ ಆಶೋತ್ತರವಾಗಿತ್ತು ಎಂಬುದು ತಮ್ಮ ಮಾತಿನ ಪ್ರಕಾರ ಸ್ಪಷ್ಟವಾಗುತ್ತದೆ. 

ಹಾಗಾದರೆ ತಮ್ಮ ಮಾತಿನ ಪ್ರಕಾರ ಪೂಜ್ಯ ಮಾತಾಜಿಯವರು ಪ್ರತಿಷ್ಠಾಪನೆ ಮಾಡಿ ಹೋಗಿರುವ (ತಮ್ಮ ಪ್ರಾಣದಂತೆ ಉಳಿಸಿಕೊಂಡು ಬಂದಿದ್ದ) "ಲಿಂಗದೇವ  ವಚನಾಂಕಿತ" ಸಂಶೋಧನೆಯನ್ನು ಕೈಬಿಡುವುದು ಗುರು ಬಸವಣ್ಣನವರ ಆಶಯಕ್ಕೆ ವಿರುದ್ಧವಾಗಿ ನಡೆದಂತೆ... ಅದೇ ರೀತಿ ಪೂಜ್ಯ ಮಾತಾಜಿ ಅವರು ಬರೆದು ಹೋಗಿರುವ ಗ್ರಂಥಗಳಲ್ಲಿ ಬದಲಾವಣೆ ಮಾಡಿ ಮುದ್ರಣ ಮಾಡುತ್ತಿರುವುದು ಕೂಡ ಗುರುಬಸವಣ್ಣನವರ ಆಶಯಕ್ಕೆ ವಿರುದ್ಧವಾಗಿ ನಡೆದಂತೆ..

ಮುಂದುವರಿದು ತಮ್ಮ ಈ ಲೇಖನದಲ್ಲಿ ತಾವು ಇನ್ನೊಂದು ಸಾಲು ಬರೆದಿದ್ದೀರಿ. "ಶ್ರೀಗಂಧದ ಮರ ಊರೊಳಗೆ ಇರಲಿ ಅಥವಾ ಕಾಡಿನಲ್ಲಿರಲಿ, ಅದು ಒಂದೇ ರೀತಿಯ ಸುವಾಸನೆಯನ್ನು  ಕೊಡುತ್ತದೆ."

ತಮ್ಮ ಈ ಮಾತಿನ ಪ್ರಕಾರ ನಮ್ಮ "ನಿಷ್ಠೆ" (Loyalty) ಮತ್ತು "ಬದ್ಧತೆ"ಯು (Commitment) ಸಮಯ ಮತ್ತು ಪ್ರಸಂಗದ ಪ್ರಕಾರ ಬದಲಾವಣೆ ಆಗಬಾರದು ಎಂಬ ಅರ್ಥವನ್ನು ಕೊಡುತ್ತದೆ. ಅಂದಮೇಲೆ ನಾವು ಪೂಜ್ಯ ಮಾತಾಜಿಯವರು ಇದ್ದಾಗ ಯಾವ ನಡೆ ಮತ್ತು ನಿಲುವು ನಮ್ಮದಾಗಿತ್ತು ಅವರು ಲಿಂಗೈಕ್ಯ ಆದಮೇಲೂ ಕೂಡ ಅದೇ ನಡೆ ಮತ್ತು ನಿಲುವು  ನಮ್ಮದಾಗಿರಬೇಕು. 

"ನಾವು ಸೂಕ್ತ ಸಮಯ ನೋಡಿ ಸೂಕ್ತ ನಿರ್ಧಾರ ತೆಗೆದುಕೊಳ್ಳಬಾರದು,", ಹಾಗೂ ನಮ್ಮ ಗುರುಗಳು (ಪೂಜ್ಯ ಮಾತಾಜಿ ಅವರು) ಮಾಡಿ ಹೋಗಿರುವ ಆದೇಶಗಳನ್ನು ಎಂಥ ಸಮಯದಲ್ಲೂ, ಪ್ರಸಂಗದಲ್ಲೂ ಕೂಡ ಕೈ ಬಿಡದೆ ನಿಷ್ಠೆಯಿಂದ ಮುಂದುವರಿಸಿಕೊಂಡು ಹೋಗಬೇಕು ಎಂಬ ಅರ್ಥವನ್ನು ತಮ್ಮ ಈ ಸಾಲುಗಳಿಂದ ಸ್ಪಷ್ಟವಾಗುತ್ತದೆ. 

🙏 ಶರಣು ಶರಣಾರ್ಥಿ 🙏

~ ಸಿದ್ದವೀರ ಸಂಗಮದ, - ರಾಷ್ಟ್ರೀಯ ಬಸವ ದಳ